Søldarfjørður

© Styrelsen for Dataforsyning og Infrastruktur

Í Søldarfirði, nevnd í Hundabrævinum, búgva 374 fólk, hon er gomul markatalsbygd og er 12 merkur av festijørð javnt býtt á tvey festi. Eingin óðalsjørð er í bygdini. Seyðatalið er 235 áseyðir.

Brøðrasamkoman hevur salin Elim, og Heimamissiónin hevur somuleiðis eitt samkomuhús í bygdini. Fyrsti skúlin í bygdini bleiv bygdur í 1892, og ein nýggjur bleiv bygdur í 1956, teknaður og bygdur av Niels Paula Hansen. Hesin skúli er seinni vorðin umbygdur og útbygdur við m.a. svimjihyli.

Undir seinna heimsbardaga bygdi bretski herurin eina oljugoymslu í Søldarfirði. Føroysku myndugleikarnir keyptu eftir kríggið grundina og goymsluna, og stutt eftir plantaðu tey trø í økinum, sum í dag er ein plantasja við spæliplássi. Havnin er vorðin útbygd og er enn undir útbygging.

Nógvir av manningini á sluppini Immanuel, sum gekk burtur í Íslandi í 1932, vóru úr Søldarfirði. Teimum varð í 1983 reistur ein minnisvarði í bygdini.

Les meira

Les meira um oyggjar, býir og bygdir í Føroyum