Lamba

© Styrelsen for Dataforsyning og Infrastruktur

Í markatalsbygdin Lamba, umrødd í Hundabrævinum, búgva 158 fólk, og hon er 29 merkur, javnt býttar á fýra festi: har er eingin óðalsjørð. Seyðatali er 880 áseyðir.

Bygdin liggur í einum smølum grønum dali, har ið áin Dalá rennur. Við áarmunnan er lending, og í fjøruni standa neystini. Ein klettur á bryggjuni skal vera íbygdur og varð tí ikki fluttur, tá ið lendingin varð gjørd.

Skipið Norska Løva, sum Danska Eysturindiafelagið átti, gekk burtur í Lamba nýggjársaftan í 1707, og umleið 100 mans vórðu bjargaðir. Á botninum, har sum skipið strandaði, síggjast enn koparplátur og ljósir barlaststeinar, og vísan Norska Løva snýr seg um hendingina. Skipsklokkan og eitt modell av skipinum hanga í dómkirkjuni í Havn.

Les meira

Les meira um oyggjar, býir og bygdir í Føroyum