Nólsoy

© Styrelsen for Dataforsyning og Infrastruktur
Keiøkið í Nólsoy við fiskiførum fremst. Mitt í myndini síggjast kjálkabeinini av einum stórhvali, sum einaferð eru sett sum heiðursportur.
MARTIN N. JOHANSEN/BIOFOTO/RITZAU SCANPIX, 2018

Í Nólsoy, sum er nevnd í Hundabrævinum og er 10,3 km2 til støddar, búgva 234 fólk. Har eru 13 merkur av festijørð, festini eru fimm, og 35 merkur eru óðalsjørð. Seyðatalið er 768 áseyðir.

Í Korndali sunnan fyri bygdina síggjast toftirnar av einum gomlum býlingi.

Fiskivinnan var fyrr, eins og í øðrum bygdum, høvuðsvinnan saman við fiskiídnað, men nógv arbeiða nú aðrastaðni. Eisini hava tónleikastað, kaffihús og ferðavinna vaksandi týdning í bygdini.

Síðani 1893 hevur viti verið á Borðuni, og har vóru eisini hús til vitapassaran og hansara hjálparfólk; vitin varð automatiseraður í 1995. Kirkjan varð bygd í 1863. Tann fyrsti skúlin kom í 1887, og ein nýggjur varð bygdur í 1970. Tey gomlu húsini við Brunn eru varðveitt sum fornminni. Sjómaðurin og tjóðarhetjan Poul Poulsen Nolsøe, Nólsoyar- Páll, var føddur í Nólsoy.

Tann sjálvlærdi náttúrugranskarin Jens- Kjeld Jensen búsettist í Nólsoy í 1970. Hann fekk Mentanarvirðisløn M.A. Jacobsens í 2012, gjørdist heiðursdoktari við Fróðskaparsetur Føroya í 2015 og vann umhvørvisprís Norðurlandaráðsins í 2020. Sjómaðurin Ove Joensen var eisini nólsoyingur, hann róði í 1986 í lítlum báti Dianu Victoriu úr Føroyum til Keypmannahavnar upp á 40 dagar. Báturin verður sýndur fram í bygdini, og síðani 1993 hava tey heiðrað hann við einari árligari stevnu, Ovastevnu.

Les meira

Les meira um oyggjar, býir og bygdir í Føroyum

  • Jóan Pauli Joensen

    (f. 1945) Dr.phil. í søgu og fil.dr. í tjóðlívsfrøði. Professari emeritus, adjungeraður professari við Fróðskaparsetur Føroya og fyrrverandi rektari Setursins.