Sørvágur

Í Sørvági búgva 1.147 fólk. Bygdin er 48 merkur, og av teimum eru 47 merkur og 8 gyllin óðalsjørð og 8 gyllin festijørð, sum ein festari situr við. Áseyðatalið er 1.436.

Fornfrøðiligir útgrevstrar hava víst, at ein garður hevur verið í Sørvági í víkingatíð. Øll jørð í Sørvági var í eldri tíð ogn hjá norsku aðalsættini Benkenstok. Í 1665 tók ein danskur keypmaður við jørðini og seldi føroyingum hana, og hon gjørdist sostatt óðalsjørð, uttan 8 gyllin, sum fóru undir kong í 1729, tí eigarmaðurin var farin ólógliga úr Føroyum. Tann jørðin var til 2007 knýtt at sýslumansembætinum, men er nú farin á aðrar hendur.

Eftir at tann gamla kirkjan í bygdini fórst í ódnarveðri, varð nýggj bygd í 1886, ein nútímans útgáva av gomlu bygdarkirkjunum. Í 1973 varð hon longd við kapelli og rúmi til prest, og í 1986 varð hon málað av nýggjum. Arkitekturin Alan Havsteen-Mikkelsen valdi litirnar. Í 2015 varð bygt serligt hús til annað virksemi hjá kirkjuni.

Brøðrasamkoman hevur samkomuhúsið Kedron, bygt í 1937. Eitt missiónshús, Libanon, kom í 1980 í staðin fyri tað gamla, ið bar sama navn og nú er ogn hjá Sørvágs Húsmøðrafelag.

Fyrsti skúlin við tveimum skúlastovum og læraraíbúð varð bygdur í 1887, og seinni er hann bygdur út í fleiri umførum. Tann gamli bygdarskúlin er nú partur av musikkskúlanum á staðnum. Í 1959 var undirvísingin víðkað, so hon røkk til 3. real. Síðan 2006 hevur verið vøggustova og barnagarður í bygdini.

Eftir at fríhandil kom, og klippfiskaframleiðsla mentist, fekk fyrst útróður og síðan skipsfiskiskapur stóran týdning í Sørvági eins og í flestum øðrum bygdum, og mong handilsloyvi vórðu latin. Í 1953 gekk handilsvirkið P/F N. Niclasen á odda við at fara undir framleiðslu av frystum fiskaflaki, og eftir stuttari tíð mentist hetta virksemið til ídnaðarframleiðslu. Eftir fíggjarkreppuna í 1992 varð henda framleiðslan niðurløgd. Seinni hevur bygdin fingið lut í tí nú so týdningarmiklu laksaalingini og framleiðsluni av laksaúrdráttum.

Einasti flogvøllur í Føroyum, Vága Floghavn, er nær við Sørvág. Bretar bygdu og nýttu hann undir seinna heimsbardaga. So seint sum í 1963 kom regluligt flogsamband til og úr Føroyum í lag.

Beint eftir seinna heimsbardaga fekk bygdin dansistovu við biografi, sum í 1969 varð innrættaður í nýggjum bygningi nærhendis ítróttaøkinum og fótbóltsvøllinum í bygdini, sum varð bygdur á Dungasandi í 1954. Har hevur síðan 2012 árliga verið hildin Country Festivalur.

Heimstaðarsavn varð stovnað í 1962 og hevur nú egnar framsýningar umframt Føroya Krígssavn.

Les meira

• Bøur
• Gásadalur
• Miðvágur
• Sandavágur
• Slættanes
• Vatnsoyrar
• Vágar

Les meira um oyggjar, býir og bygdir í Føroyum