Dalur

Dalur er 23 merkur. Av teimum er 1 mørk festijørð, sum ein festari hevur, og 22 merkur eru óðalsjørð. Áseyðatalið er 793. Í Dali búgva 34 fólk.

Sermerkt fyri bygdina er tað nógva malargrótið í fjøruni. Dunið hoyrist týðiliga frá grótinum, tá ið aldurnar bróta tvørtur um tað. Bygdin hevur eina lítla bryggju, og vegur er til Húsavíkar. Í 2022 var tunnil úr Húsavík skotin hálva leið ígjøgnum.

Dalur fekk kirkju í 1957. Hon er bygd úr timbri á steingrund. Altartalvan, sum vísir kvøldmáltíðina, er eftir Ernst Trier úr Vallekilde og er frá 1960.

Dalur hevur fostrað nógvar kvæðakempur og góðar dansarar. Í bygdini er dansifelag og dansistova.

Fyrr var Dalur ein av teimum fáu bygdunum, har kópaveiða var týðandi partur av búskapinum, kópur varð veiddur við nót t.d. á Skerhellum.

Les meira

• Húsavík
• Sandur
• Skálavík
• Skarvanes
• Skopun
• Sandoy

Les meira um oyggjar, býir og bygdir í Føroyum