Landsbókasavnið

Landsbókasavnið húsast í J. C. Svabos gøtu 16. J. P. Gregoriussen teknaði bygningin, og hann stóð liðugur í 1980. Landsbókasavnið er sprottið úr Amtsbókasavninum (Færø Amts Bibliotek), ið var stovnað í 1828 og mett at vera elsti mentastovnur í Føroyum. Í 1931 flutti bókasavnið í nýggj hús á Debesartrøð (Gróthúsið). Landsbókasavnið varð stovnað sambært løgtingslóg í 1952. Savnið er bæði tjóðar- og meginbókasavn og hevur ljóðbókatænastu fyri blind og sjónveik og stendur eisini fyri at gjalda út bókasavnspengar. Á savninum er ein ørgrynna av handritum hjá føroyskum rithøvundum, og harumframt eigur savnið mong eldri handrit, eitt nú Sandoyarbók, hon er latin savninum í varðveitslu frá Kongaliga Bókasavninum í Keypmannahavn, og í henni eru summar av elstu uppskriftunum av Karlamagnusar kvæði at finna.

Landsbókasavnið er eitt granskingarbókasavn, og í umbúna er, at tað skal gerast Universitetsbókasavn, nú ætlanir eru um at byggja nýtt fróðskaparsetur. Í flestu bygdum og býum eru fólkabókasøvn og summastaðni fólka- og skúlabókasavn undir sama taki.

Les meira

• Bókmentir
• Byggisiðir í Føroyum
• Felagslív og sjálvboðið arbeiði
• Kirkjur
• Listahandverk og sniðgeving
• Mál og málføri
• Myndlist
• Siðsøgulig søvn og mentanararvur
• Siðvenjur og frásagnir
• Tjóðsavnið
• Tjóðskjalasavnið
• Trúgv og trúarligt virksemi

Les meira um føroyska mentan