Gásadalur

© Styrelsen for Dataforsyning og Infrastruktur
Kaffistovan og gistingarhúsið hjá Gásadalsgarði fáa nógvar gestir. Ikki minst vitja tey mongu ferðafólkini, sum koyra gjøgnum tunnilin at síggja víða gitna Múlafoss. Áðrenn tunnilin kom, var bygdin ógvuliga illa atkomandi, antin tú so ferðaðist eftir sjónum ella eftir bygdargøtuni.
ÓLAVUR FREDERIKSEN, 2017

Í markatalsbygdini Gásadali búgva 13 fólk, og hon hevur 18 merkur. Av teimum eru 3 merkur og 8 gyllin festijørð, sum er býtt millum tveir festarar, og 14 merkur og 8 gyllin eru óðalsjørð. Áseyðatalið er 576.

Áðrenn tunnilin til Gásadals varð tikin í nýtslu, var bygdin illa atkomulig bæði sjóvegis og yvir land, men nú er Gásadalur eitt væl umtókt ferðamál, serliga er at nevna Múlafoss.

Í Gásadali síggjast toftir av garðinum hjá tí múgvandi Gæsu úr Kirkjubø, sum sagnir siga frá. Katólsku kirkjumyndugleikarnir dømdu hana at missa allar ognir fyri at hava etið kjøt í føstu. Tá ið hon flutti til Gásadals, fekk hon 7 merkur í jørð frá systursyni sínum.

Um 1830 búsettist fólk í niðursetubygdini Víkum í Gásadalshaga, men plássið var so illa atkomandi og fjarskotið, at tey síðstu fólkini fluttu haðani í 1910. Eins og Mykineshólmur vóru Víkar gott beiti til oksar og drápsneyt.

Í mong ár var yrkjarin og sálmaskaldið Mikkjal á Ryggi ferðalærari í Gásadali og Bø.

Les meira

Les meira um oyggjar, býir og bygdir í Føroyum

  • Jóan Pauli Joensen

    (f. 1945) Dr.phil. í søgu og fil.dr. í tjóðlívsfrøði. Professari emeritus, adjungeraður professari við Fróðskaparsetur Føroya og fyrrverandi rektari Setursins.

  • Jon Sigurð Hansen

    (f. 1967) Cand.mag. í søgu. Rithøvundur, sjálvstøðugur.