Akraberg

© Styrelsen for Dataforsyning og Infrastruktur
Akraberg er syðst í Føroyum. Her varð bygdur viti og hús til vitastarvsfólkini í 1909. Nú er vitin í Akrabergi eins og aðrir vitar í Føroyum fjarstýrdur. Starvsfólkahúsini eru seld til privat.
ÓLAVUR FREDERIKSEN, 2016

Akraberg er syðsta stað í Føroyum. Brimpláss er og sera ábært. Tað sigst, at frísar búðu har frá umleið 1040, til sóttin svarta gjørdi enda á teimum. Nógvar sagnir eru um frísarnar í Akrabergi, ið vóru heidnir langt eftir, at Føroyar vóru kristnaðar. Eystarumegin, í tí brøttu brekkuni við vitan, síggjast lágir regluligir ryggir, sum kanska einaferð hava verið partur av tí frísisku bygdini.

Í 1909 varð Vitin á Akrabergi undir Vita- og Siglingamerkjaverki Ríkisins vígdur, og nýmótans hús vórðu bygd til vitameistaran og hjálparar hansara við familjum. Í 1988 flutti síðsta vitapassarafamiljan, húsini vórðu seld og eru nú frítíðarhús.

Ein veðurstøð og ein millumbylgjusendari eru staðsett í Akrabergi. Har er eisini farvegur eftir bretsku hersetingina undir seinna heimsbardaga. Akraberg er í dag høgt í metum sum ferðamál. Tá ið sýnið er gott, síggjast tey syðstu skerini hiðani, Flesjarnar og Sumbiarsteinur, sum er einar 6 km sunnan fyri Akraberg.

Les meira

Les meira um nátturuna og landslagið í Føroyum

  • Annika Y. Skaalum

    (f. 1958) Cand.phil í søgu, hjágrein í stjórnmálafrøði. Lærari á Glasi og Fiskivinnuskúlanum í Vestmanna. Skjalavørður á Tjóðskjalasavninum.